容易俾位男友搵小三嘅3個弱點！

男人搵小三，輕則俾朋友圈譴責，重則俾全城唾罵，偷食男固然唔要得，最激心係個正印其實條件不知幾好，咁先令人戥佢哋唔抵！男人走去偷食，未必因為女友唔夠好，而係睇中女友一啲弱點，先咁不顧後果！以下幾種情況較易俾人乘虛而入，CG!們要注意喔！

弱點1：成日問佢係咪鍾意第二個
有啲女生日日都問一次，以為咁可以令自己安心啲，但會適得其反，因為咁樣代表女友唔信佢，成日問長問短，指控佢一啲佢無做過嘅事，結果佢不如索性如你所願，反正佢本來就日日都俾人咁樣懷疑。情況就好似一個小朋友成日俾父母話佢曳，結果佢真係會好曳，因為……係你哋話架嘛！

弱點2：情緒多起伏
女生好多時都攞正牌扭下計、鬧脾氣，但如果太鬆懈，以為男友明架啦，久而久之，會令身邊嘅男人失去安全感，相處時要步步為營，怕自己講錯說話、做錯嘢，結果令佢開始想喺出面其他地方搵安全感、舒適感。

弱點 3：拒絕親密
「拍拖初期就打得火熱，後來變咗老夫老妻就開始減少親密環節」，呢種情況好多女生都覺得無乜嘢，但男生就唔係咁諗，就算女友已經無以前咁悉心打扮、無咁嗲、無咁客氣，佢哋對呢個環節係唔會厭嘅；對佢哋嚟講，件事係由有變成無，或者等過時過節先被「賞賜」一次半次，佢哋會覺得自己似塊發霉爛毛巾，為咗挽救一點一滴流逝緊嘅自信心，佢哋好可能會選擇「挺而走險」……

講到呢度，CG!們應該都知道要點做，先可以減輕男友出軌嘅機會，但係除咗做好自己本份，都要提防一下身邊可能引誘到男友嘅女生，詳情即睇：提防容易做小三的4類女生！