《記得感謝身邊那位2016年的陪伴》

去到2016年尾，老套地忍唔住喺腦裡回顧一下自己嘅一年。每一年都有高有低，有開心嘅時候但都有失意嘅時候，人大咗知道感情好脆弱，所以更加好想感激身邊人喺呢一年無條件陪住自己走過高山低谷。

容祖兒嘅《特別嘉賓》有句歌詞係咁講：「當我最快樂時替我高興，當我要放任時賜我反應」幸運除咗係有一個喺自己開心得意時替自己開心埋一份嘅另一半，仲係有一個會喺你傷心失意時扶你一把陪住你嘅人。回望起2016一年，又係邊個陪你走你嘅高山低谷？

快樂嘅事其實好易忘記，反而傷痛嘅事會比較難忘。回望過去一年我都差啲忘記今年同另一半去咗幾多次旅行，反而我最記得自己呢一年最唔開心嘅日子身邊支持住自己嘅係邊一個。到今日諗番我仍然好感激另一半喺我失意時嘅不離不棄，因為我知道搵個陪你去風花雪月嘅人其實唔難，但係搵到一個肯陪你風雨同路嘅人先難！

我個人覺得跨年其實比聖誕更有意義，兩個人喺2016年最後一日一齊回顧下呢一年一起走過的日子，然後發現原來大家都經歷咗好多，仲可以順手一齊寄望2017。除夕最重要嘅唔係去食咩大餐，而係上年，今年，明年，以後，身邊都可以係同一個人一齊回顧一齊渡過就好。